Alla Itolae Nusa 48
Eleki takwali mo tamata sae me ikeu lora ibeteke kena Yusupe be,
“Amamu kerakeni!”
Eleki Yusupe ikeri eni nana luaru Manase kai Epraime loko Yakupe.
Eleki kena esi beteke ete Yakupe be,
“Yusupe iluake lokomu.”
Eleki Israele iaktilini kena irue me eni niane maka ntulure.
Eleki Yakupe ibeteke loko Yusupe be,
“Alla rebe Ikbasare IaselukeNi lokoku me Luse ndi tape Kanane kai Iriluke misete ete au
kai Ibeteke lokoku be,
‘Au pine Au ono imi supu kwetela kai upua kai Au ono imi nebu rame eti imi ono nusa toini kai Au riluke tape Kanane meije ete imi eti pela.’Hoko kena meije amu anae lua rebe ruelesi mei Mesire rebe kena au luake lokomu mei Mesire mosare esi leue au hoko auku Manase kai auku Epraime sakesa lupe Rubena kai Simone neka.
Kai asupu kwetela rebe pamuli beisi lekwe hoko mere leue ale po kena lara tapele esi nanaru kusu me kwalini luasi neka.
Au ono pusue meije ete inamu Rahela le kena au leu bei me Padane-Arame, Rahela imata me lalane tlai me tape Kanane hoko hnoukeni me lalane leine neka lau bei Eprata mo hoko au laleku noai titinai.”
Eprata pamuli meije esi nane Betleheme.
Eleki kena Israele iselu Yusupe eni nanaru eleki itneu be,
“Meije kwete siasi?”
Yusupe iralake amai be,
“Meije auku kwetela rebe Alla Irilukesi ete au mei Mesire.”Eleki Yakupe ibeteke be,
“Tehaike au lomei leke au kotie le luasi mina.”Yakupe irena mise moneka le intua peneka hoko mataije selu mise moneka. Eleki Yusupe ikeri luasi tehaike Yakupe eleki inopa luasi kai iata luasi.
Eleki Yakupe ibeteke loko Yusupe be,
“Au betinake au selu suike ale moneka po meije Alla iono au selu batuke ale mo po kai amu anaru.”Eleki Yusupe irana eni nanaru bei Yakupe eleki Yusupe ruai tatu loko Yakupe roma tapele.
Eleki Yusupe ikerike luasi hoko ikerike Epraime kena eni bala makwanale hoko mere me Israele eni bala mapale kai kena eni bala mapale ikerike Manase hoko mere me Israele eni bala makwanale eleki iliku luasi tehaike Israele.
Po Yakupe itolae eni bala makwanale kena Epraime masike ile kwete muli yo itolae eni bala mapale kena Manase masike Manase kwete mena hoko Yakupe eni balai luaru tapekwa.
Eleki pela mina pine iriluke misete ete Yusupe hoko ibeteke be,
“Upuku Abrahame kai amaku Isake esi hlaleke loko Alla kai Alla mere pine iraka auku nasite eti roma meije,
kai lupe malekate rebe etie au bei susate, Ile mere pine iraka kwete beluke meiju leke auku nane kai upuku kai amaku Abrahame kai Isake esi nane pusue tamata esi rekwae kai eti esi nebu rame eti esi boka mei nusa meije.”
Yusupe laleije ndina mo le iselu amai tola eni bala makwanale kena Epraime uluije, hoko ikerike amai eni balaije leke ihetiele bei Epraime ulu buaije kena Manase ulubuaije.
Hoko ibeteke loko amai be,
“Ama tola bala ele mere yake le meije kwete menare hoko tola amu bala makwanale kena ulubuaije.”
Po amai suka mo hoko ibeteke be,
“Au rekwa auku anae, au rekwa ile lekwe iono nusa toini kai eni kbasare ela, masike ele mere po kwalini mulire eni kbasare ela lesi beini, kai eni anubuaru esi boka lakwai esa mei nusa meije.”
Eleki ikotie le luasi kena mere, hoko ibeteke lokosi be,
“Tamata Israele esi kotie le lomai hoko esi lepa imi luami nane sa. Hoko esi lepa elemeije, ‘Alla iriluke misete ete ale noma lupe Epraime kai Manase.’”
Ele mere hoko ikotie le Epraime akmena bei Manase.
Eleki Israele ibeteke loko Yusupe be,
“Takwali mo au mata neka po Alla Iraka imi kai Ileuke imi lori upumu esi tapele.
Hoko kena meije au riluke lesi etemu bei kwalimusi hoko tapele nkopane Sikeme rebe au rana bei tamata Amori kena lisare, au rilukele ete ale.”